ألبوم حلب

Դոկտ. Երուանդ Զօրեանի Կենսագրական Տուեալները Դոկտ. Երուանդ Զօրեանը ծնած է Հալէպ: Ազգային Հայկազեան Վարժարանի եւ ՀԲԸՄ-ի Լազար Նաճարեան Գալուստ Կիւլպէնկեան Վարժարանի շրջանաւարտն է: Իր մագիստրոսի (MS) կոչումը, համակարգչային ճարտարագիտութեան մէջ, ստացած է Հարաւային Գալիֆորնիայի համալսարանէն (USC), իսկ Առեւտրական վարչութեան մագիստրոսի (MBA) կոչումը` Ուորթն առեւտրական դպրոցէն (Wharton School of Business) , Փենսիլվանիայի (Pennsylvania) համալսարանէն: Ան Դոկտորի (PhD) կոչում ստացած է McGill համալսարանէն՝ ելեկտրական ճարտարագիտութեան ճիւղին մէջ։ 2004-ին հիմնած է, ՀԲԸՄ-ի Հայկական Համացանցային Համալսարանը: Ան «ԱրմԹեք» Կոնգրեսի ծրագիրներու բաժինի նախագահն էր եւ Հայաստանի Ամերիկեան Համալսարանի հոգաբարձու անդամներէն մին: Ունի Հայաստանի Գիտութիւններու Ազգային Ակադեմիայի Պատուաւոր Դոկտորի կոչում: Այժմ, ան ՀԲԸՄ-ի Սիլիքոն Վելիի մասնաճիւղի ատենապետն է: Հոկտեմբեր 2008-էն ի վեր, Դոկտ. Երուանդ Զօրեան ՀԲԸՄ-ի Կեդրոնական Վարչական Ժողովի անդամ է ։ Դոկտ. Երուանդ Զօրեանը Սինօփսիս (Synopsys) ընկերութեան (Սան Ֆրանսիսկո Պեյ Արիա, ԱՄՆ) գլխաւոր ճարտարագէտն է եւ Սինօփսիս (Synopsys) Հայաստանի նախագահը: Ան եղած է AT&T Bells–ի ճարտարագիտական անձնակազմի պատուաւոր անդամը, Վիրաժ Լոճիկ (Virage Logic) ընկերութեան փոխ նախագահն ու գլխաւոր գիտնականը եւ Լոճիկ Վիժինի (LogicVision ) ճարտարագիտութեան գիծով գլխաւոր խորհրդականը։ փրոֆեսոր է British Columbia Համալսարանին մէջ եւ 50-րդ DAC եւ ITC գիտաժողովներուն գլխաւոր նախագահ: Երուանդ Զօրեանը ստացած է ԱՄՆ աւելի քան 40 արտօնագիրներ (US Patents) փորձարկման եւ վերականգման բնագաւառին մէջ, ինչպէս նաեւ շարք մը «Լաւագոյն Աշխատանք» մրցանակներ: Ան աւելի քան 400 գիտական յoդուածներու եւ 5 գիրքերու հեղինակ է: 2005-ին Դոկտ. Երուանդ Զօրեանը ստացած է IEEE-ի «Արդիւնաբերութեան Մէջ Առաջատար» կարեւոր մրցանակը՝, իսկ 2006-ին՝ IEEE Հանս Քարլսոնի անուան մրցանակը: 2014-ին պարգեւատրուած է Հայաստանի Հանրապետութեան Ազգային շքանշանով՝ գիտութեան մարզի մէջ: